Conversas arredor de Xorima

Conversas arredor de Xorima, de Paulo Naseiro, describe a xénese e traxectoria do grupo Xorima até converterse nun referente do folk galego dos anos 80 a través de conversas cos membros do grupo e con persoas relevantes da súa historia, ademais dunha introdución que nos sitúa nas coordenadas sociais e culturais da época. Conta ademais co apoio de abundante material gráfico a cor, en forma de fotografías da traxectoria do grupo, cartaces e recortes de prensa.

A presentación do libro Conversas arredor de Xorima tivo lugar no Auditorio Municipal de Vilalba o día 19 de marzo de 2022, nun evento que tamén contou coa actuación de Xorima.

Podes ler o libro facendo clic na imaxe.

Portada do libro Conversas arredor de Xorima

O autor

Paulo Naseiro (Vilalba, 1970) era un daqueles nenos que seguían aos gaiteiros nos pasarrúas, e de mozo saltaba nos concertos de Xorima. É o xerme dunha vida dedicada a cultivar varias disciplinas artísticas e literarias a narrativa longa ou breve, a investigación histórica e social, o xornalismo non sensacionalista e a farándula; domina o chairego a nivel nativo e as malas línguas din que toca o tamboril.

«O Auditorio de Vilaba foi, no serán do pasado 19 de marzo, un contedor de nostalxia, unha especie de máquina do tempo pilotada por un piano, baixo, guitarra, violín gaita, frautas e percusión. Tórnase difícil, para os afortunados que puideron pechar os ollos en directo e volver a aqueles anos oitenta nos que fomos mozos e ousados, describir o rego de sensacións vividas ao son dunha música que xa é patrimonio de todos.

Xorima, Feira de Santos, O gaiteiro avergoñado, Compañeiros, A Cova da Serpe, Muiñeira-Xiga e o inédito Pasacorredoiras de Vilaba, ofreceron ao público que encheu o patio de butacas unha morea de sensacións. Houbo algo no ambiente difícil de explicar, unha estraña brétema formada pola mestura dunhas notas gravadas na memoria de todos, e máis a saudade por un tempo que se foi, pero que deixou en todos nós unha pegada que é imborrable.

Xosé Ramón, Queno, Pernas e Lalo, apoiados por Quim Farinha e Carlos Currás Bobé, tiveron a culpa deste andazo que contaxiou a un público entregado de antemán. Cada compás foi unha chave que abría os corazóns e alentaba lembranzas felices, vividas tamén xunto aqueles que quedaron polo camiño pero que seguen presentes mentres teñamos memoria.

A maxia dun serán inesquecible tróuxonos tamén aos que, aínda que non subiron ao escenario, foron parte tamén da historia do grupo: Máire, Siobhán, Xabier, Chus e, sobre todo, Carlos Celeiro, o grande Morón, mestre e iniciador na nosa música tradicional de tantas xeracións de xoves.

Por compoñer a banda sonora da nosa mocidade, e tamén por este fantástico agasallo en forma de reencotro, grazas, Xorima!»

Paulo Naseiro

Este sitio web utiliza cookies, podes ver a nosa pólitica de cookies aquí. Se continúas navegando estás aceptado o seu uso.